德甲孖寶開齋又如何?車路士又跌2分

2020年10月17日 23:59
東網電視
更多新聞短片
德甲孖寶(Getty Images)
足球博彩神器,每日重心提供盡在《彩報》:http://win.on.cc/football/ 
周六晚英超賽事,車路士主場雖有德甲孖寶迪姆華拿及夏維斯相繼在英超開齋,無奈後防又大意失波,臨完場失守遭修咸頓逼和3:3,再失2分,門將阿列沙巴拿加及中堅葛迪蘇馬又孭鑊,後防有排執。
10分鐘迪姆華拿攻破對方大門,但越位在先判詐胡,5分鐘後迪姆華拿自己攞波舞埋龍門口,再勁射破網,今次球證冇得吹越位判詐胡,車路士領先1:0,亦係該德國國腳加盟英超首個入球。
一不離二,迪姆華拿又入波,30分鐘,佐真奴費路後場大腳送上前,迪姆華拿衝前單刀,挑過對方門將再用頭頂入成2:0。完半場前修咸頓破蛋,夏維斯中場失誤,查阿當斯得球後快傳丹尼艾格斯,後者順利射破阿列沙巴拿加十指關,追成1:2接近紀錄。
57分鐘,車路士輸個失魂波,葛特蘇馬回傳唔夠力,被查阿當斯單刀,阿列沙巴拿加出迎又封唔晒,雖然查阿當斯已經失位,但Kepa又解唔到圍,卒之畀查阿當斯攞番個波再勁射破網,修咸頓追成2:2,呢個失波車路士可以話自己攞嚟。
不過2分鐘後車路士又領先,迪姆華拿右路落底傳中,夏維斯近門輕易射成3:2,亦係佢征戰英超嘅首個入球。
戰至補時2分鐘,修咸頓死球攻勢,葛迪蘇馬頭槌解圍不遠,近日回巢嘅禾確特大腳抽射,維斯達加特門前加一頭批入,修咸頓逼和3:3完場。