愛華頓贏波逼近前4　爭做默郡「一哥」

《英超刨績王》加強版，最強數據一網打盡：http://win.on.cc/football/　

周二(2日)凌晨英超大戰，愛華頓主場出擊雖然表現差勁，但仍然憑李察利臣一箭定江山，以1比0小勝修咸頓全取3分。愛華頓贏波後有43分同死敵利物浦睇齊，排第7位嘅佢哋只落後第4位韋斯咸2分，而且比前6名球隊都少踢1場，爭入前4形勢不俗。

愛華頓射手卡維特利雲傷愈後狀態麻麻，好在巴西前鋒李察利臣啱啱撻著，開波9分鐘就接應基菲爾施古臣助攻，扭過埋龍門射入，連續3場聯賽拎到入球。愛華頓領先後表現麻麻，修咸頓想反攻亦都有心無力，兩隊全場只係各有1次中龍埋門，最終愛華頓靠早段入波贏出比賽。

愛華頓教練安察洛堤賽後亦揚言以歐聯為目標：「拎到前4位置係一個夢想，我哋依家非常接近，但聯賽仲有好長嘅路，球隊原本目標係拎到歐霸盃資格。」愛華頓周五(5日)凌晨作客西布朗，贏波就可以先過「4哥」癮，安察洛堤話：「我哋面前有個好好嘅機會(入前4)，我諗我哋好樂意去坐呢個位置。」