東網電視
更多新聞短片
《英超刨績王》加強版，最強數據一網打盡：http://win.on.cc/football/
曼聯上場聯賽0比0悶和車路士，比賽入面嘅12碼爭議成為話題，賽後曼聯領隊蘇斯克查同左閘勞基梳爾分別怒插球證，其中勞基梳爾更直指球證艾維爾自爆因「唔想成為話題」，所以先至唔判12碼。正當全世界認定英格蘭足總將提出檢控，勞基梳爾突然改口話係「一場誤會」，最終成功逃過足總檢控。
據英國《每日鏡報》報道，英格蘭足總一向容許領隊或球員批評球證，但就唔可以攻擊球證嘅誠信，蘇斯克查質疑艾維爾受其他領隊言論影響，勞基梳爾話艾維爾怕成話題而唔判12碼，明顯就係攻擊球證嘅誠信，不過英格蘭足總周一(1日)證實，蘇斯克查同勞基梳爾都唔會受到檢控。
消息指足總呢個決定，係建基於好難搵到證據證明勞基梳爾嘅言論真假，更加重要嘅係，曼聯官員事後公開澄清，話勞基梳爾只係聽哈利馬古尼轉述，同時強調勞基梳爾「錯誤理解」哈利馬古尼所講嘅說話。既然曼聯都識做，英格蘭足總亦決定息事寧人。
