英格蘭加時贏丹麥 歷史性殺入歐國盃決賽

香港時間
2021年07月08日(四) 05:36
東網電視
更多新聞短片
荷蘭巨星柏金,全面拆解歐國盃:https://bit.ly/3zC3leS 
歐國盃決賽戲碼出爐!周四(8日)凌晨4強大戰英格蘭鬥丹麥,英格蘭憑哈利卡尼喺加時階段射入致勝球,主場2比1反勝丹麥,歷史性殺入歐國盃決賽,周一(12日)凌晨將會喺溫布萊決戰意大利,爭奪冠軍寶座。英格蘭之前喺歐國盃最佳成績係1968年拎季軍,今屆無論結局係點,都係英格蘭歷來最佳成績。
溫布萊6萬主場球迷打氣下,英格蘭早段採取主動,13分鐘史達寧禁區內勉強起腳被卡斯柏舒米高接實,之後哈利卡尼禁區頂狂抽又高出;丹麥企穩陣腳後,利用反擊反而製造更多埋門機會,30分鐘丹麥喺禁區頂獲得罰球,丹斯加特炮彈式罰球直射入網,亦係英格蘭今屆賽事第1個失球。
英格蘭失波後如夢初醒,38分鐘史達寧近門施射被卡斯柏舒米高擋出,1分鐘後沙卡突破越位傳中,卡積亞喺史達寧壓逼下情急擺烏龍,英格蘭半場追成1比1平手。55分鐘哈利馬古尼接應罰球頭槌攻門,卡斯柏舒米高精彩飛身撲出,英格蘭尾段控制大局,哈利馬古尼83分鐘頭槌頂斜,但面對丹麥血肉長城始終未能搵到入波。
加時階段英格蘭繼續圍攻丹麥,哈利卡尼94分鐘窄角度射門又一次被卡斯柏舒米高瞓身撲出;104分鐘出現爭議一幕,史達寧殺入禁區被米希利勾跌博到12碼,哈利卡尼操刀雖然被卡斯柏舒米高撲出,但佢反應夠快補射入網,英格蘭憑呢個入波拎到歷史性勝仗。
感謝您瀏覽東網。請按入詳細閱讀本網站所載之使用條款及細則私隱政策聲明,並須確定您同意接受有關條款及聲明的約束才可繼續瀏覽。