杜曹神調動!車路士贏維拉利爾奪歐超盃

2021年08月12日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周四(12日)凌晨歐超盃大戰,歐聯盟主車路士同歐霸盃冠軍維拉利爾激戰120分鐘打和1比1,喺進入互射12碼階段前,車仔領隊杜曹換入後備門將阿列沙巴拿加,結果呢位西班牙門將勇救2個12碼,協助車路士喺「突然死亡」贏6比5,球會史上第2度贏得歐超盃冠軍。
車路士今場繼續排出3-4-3陣式,成功搶到比賽主導權,上半場27分鐘就由薛耶治接應夏維斯傳中射入,但呢位入波功臣完半場前傷出,影響車路士進攻力。換邊後維拉利爾力圖反撲,終於喺73分鐘由王牌前鋒謝拉特摩蘭奴入波追平。兩隊之後一直僵持,要靠互射12碼分勝負。
杜曹喺119分鐘嗰陣,特別換入阿列沙巴拿加代表艾度亞文迪把關,明顯睇中佢救12碼嘅能力,阿列沙巴拿加亦都不負所託,先喺第2輪救出艾沙文迪射門,再喺第7輪「突然死亡」撲出艾比奧爾嘅決定性一射,成為今場捧盃英雄。
延伸閱讀:【2年前尷尬回憶!Kepa做英雄要多謝文迪】
車路士對上一次贏歐超盃冠軍已經係1998年,之後3次出戰呢項賽事都飲恨面回,今年第5度參賽終於重溫舊夢,杜曹亦成為車路士史上首個贏晒歐聯同歐超盃冠軍嘅領隊。