麥巴比做隊長兼開齋　PSG贈紅鑽3蛋

周六晚（23日）巴黎聖日耳門（PSG）展開日本之旅第2站，雖然鋒線「MNM」只有基利安麥巴比擔正，但佢取得今夏熱身賽開齋波，最終大勝浦和紅鑽3:0。<br/><br/>PSG今仗先收起兩大王牌美斯同尼馬，由「麥經理」基利安麥巴比擔大旗，16分鐘佢彈畀莫路伊卡迪，再回傳畀沙拉比亞遠射先開紀錄，今仗做隊長嘅麥巴比特別醒神，36分鐘喺左路窄位射成2:0，取得佢今夏熱身賽首個士哥。下半場紅鑽一度藉前場逼搶攞番優勢，可惜多番射門都過唔到門神基羅拿華斯，其後麥巴比被換出，美斯同尼馬齊齊入場，並由小將卡利穆恩度整多粒，最終輕取3:0，繼上仗擊敗川崎前鋒後，於日本之旅連贏2場。