做完英雄即出事　黑仔王科芬拿疑受重傷

足球博彩神器，每日重心提供盡在《彩報》：http://win.on.cc/football/　

夏天以7,000萬鎊高價加盟車路士嘅韋斯利科芬拿，轉會後表現一直受到質疑，呢位法國中堅周四(6日)凌晨歐聯終於做英雄，喺對AC米蘭一仗門前混戰中先開紀錄，拎到喺車路士第1個入球，但係佢上半場尾段喊住傷出，賽後更要揸枴枚行路，情況令人擔心。

上半場尾段，科芬拿同拉菲爾利亞奧爭波期間拗傷，最初睇落冇乜大問題，但佢之後愈行愈痛，被換走嗰陣更神情哀傷兼落淚，完場後更被影到要拎住2枝枴枚行路。車路士領隊樸達賽後表示：「科芬拿受傷係全晚唯一負面消息，我唔想胡亂猜測，要等進一步檢查結果，希望佢冇大礙。」

21歲嘅科芬拿係黑仔王，上季季初佢因為斷腳，休息咗超過7個月時間，如果今次再受重傷，唔單止冇機會出戰年底世界盃決賽周，對車路士亦係重大打擊。