森林取消谷巴續約　傳搵賓尼迪斯接手

足球博彩神器，每日重心提供盡在《彩報》：http://win.on.cc/football/　

英格蘭老牌球隊諾定咸森林今季重返英超，不過班主馬連拿基斯嘅管理就受到質疑，佢今個夏天破紀錄簽入23個新球員，成隊波面目全非，結果開季8場只得1勝排包尾，據報球會準備換埋領隊谷巴，已經取消之前向佢開出嘅新合約，考慮拉賓尼迪斯接手。

森林今季雄心勃勃，夏天用1.4億鎊簽入23個新球員，仲向領隊谷巴開出新合約，希望可以大展拳腳，點知球隊表現差勁，英國《每日郵報》報道，馬連拿基斯已經取消谷巴份新合約，成為「炒魷」一大訊號，森林下場聯賽對維拉，可能係谷巴嘅生死戰。

除咗谷巴個帥位危危乎，據報球會首席球探史葛、首席執行官梅菲同資料分析主管施利安奴斯都面臨被炒魷，目前以顧問身份幫手嘅前紐卡素主席查恩尼，有望正式加入管理層，佢嘅加入亦令前紐卡素領隊賓尼迪斯上任機會大大提升。