傷得及時？達雲紐尼斯唔使踢國際賽

最強博彩盤路過關神器《串績王》：http://win.on.cc/football/　

利物浦上仗歐聯16強次回合不敵皇馬出局之餘，仲有前鋒達雲紐尼斯疑似受傷退下線，烏拉圭足總宣布呢位23歲射手因傷退隊，無法參加3月底2場國際賽。對於利物浦而言可能係「好消息」，達雲紐尼斯可以專心休息，準備4月1日英超大戰曼城。

利物浦並冇公布達雲紐尼斯傷勢情況，但估計並唔嚴重，由於烏拉圭未來2場國際賽只屬熱身賽性質，分別3月24日作客對日本，4日之後作客南韓，所以足總批准達雲紐尼斯免役，唔需要出席今次亞洲之旅，以免因小失大。

達雲紐尼斯今季加盟利物浦後，上陣20場英超入8球及3次助攻，即使整體表現一般，但始終發揮一定作用，領隊高普都唔希望佢舟車勞頓踢國際賽，難怪唔少球迷認為達雲紐尼斯今次「傷得及時」。

利物浦要等到4月1日晚先至有比賽，出戰英超作客曼城，正好趁呢段空檔畀球員休息再上路。