列迪古又入波　文仙尼宣布意大利「國際化」

最強博彩盤路過關神器《串績王》：http://win.on.cc/football/　

意大利周一(27日)凌晨喺歐國外C組打開勝利之門，憑住阿根廷「外援」列迪古再次入波，作客2比0擊敗馬爾他全取3分。睇住列迪古代表意大利連續2場入波，領隊文仙尼賽後宣布意大利將會行「國際化」路線，繼續物色有意大利血統嘅球員「加盟」。

意大利上仗主場1比2不敵英格蘭，喺阿根廷土生土長、連意大利文都唔識講嘅列迪古入籍後首次披甲即入波，今場佢喺15分鐘再一次建功，為意大利先開紀錄，馬迪奧比辛拿27分鐘入波拉開到2比0，意大利最後以呢個比數贏波。

列迪加代表意大利引起唔少爭議，不過文仙尼賽後強調呢個係國家隊未來路向：「列迪古嘅入球能力係與眾不同，亦係我哋睇中佢嘅地方，佢需要時間適應歐洲足球，如果可以嚟意甲比賽就更好。意大利好可能會繼續國際化，目前意甲只有少量意大利球員上陣，你睇下瑞士、比利時、法國、德國、英格蘭都係咁做，以前我哋有好多出色球員選擇，所以唔需要咁做，但其他國家已經做緊，依家我哋都要做相同嘅事。」