意大利新帥公布大軍名單　棄用2位球星

意大利國家隊新帥史巴列堤首次公布大軍名單，最大改變係棄用2位中場佐真奴、馬高華拉堤，呢位64歲「光頭名帥」新官上任三把火，講明唔會考慮球員名氣，如果有人缺乏承擔或者表現欠佳，一樣會被拒於門外。

史巴列堤率領拿玻里奪得上季意甲冠軍後離隊，早前接替突然辭職嘅文仙尼，成為意大利新帥，佢首份國家隊名單，同文仙尼時期最大分別係重召被文帥冷落嘅2位中堅阿利斯奧羅馬洛尼、基安盧卡文仙尼，36歲老將邦路斯落選。

另一個焦點係佐真奴、馬高華拉堤榜上無名，史巴列堤回應2人落選問題時話：「承擔及行為表現係我揀人嘅重要因素，而非球員名氣，我想告誡球員，你哋必須以代表意大利為榮，國家隊球衣就係與眾不同。」

事實上，佐真奴由車路士轉投阿仙奴後，未能獲得正選，加上佢曾於世界盃外圍賽射失關鍵12碼，成為球隊未能打入上年決賽周嘅罪人，至於馬高華拉堤近年代表國家隊表現亦欠佳，被棄用並唔出奇。

意大利將於9月10日歐國盃外圍賽作客北馬其頓，3日之後主場對烏克蘭。