【有片】奧巴美揚仲掂！精彩倒掛射爆阿積士
2023年12月01日 09:00
東網電視
更多新聞短片
奧巴美揚今場連中三元。
曼聯新星阿歷真度加拿祖早前精彩倒掛入波技驚四座，周五(1日)凌晨歐霸盃亦有倒掛金勾入波出現。34歲嘅奧巴美揚喺馬賽主場對阿積士一仗，個人大演帽子戲法協助馬賽贏4比3，下半場嘅倒掛入波盡顯功架，並帶領馬賽喺B組排榜首。
今場比賽兩隊鬥攻，馬賽9分鐘就由奧巴美揚射入12碼領先，但1分鐘後就被拜仁博比追平，馬賽嘅贊素梅賓巴26分鐘入波，再一次閃電被拜仁博比扳平2比2。換邊後2分鐘，奧巴美揚接應隊友右路傳中，門前10碼倒掛轟入，但阿積士前鋒艾卡邦第3度為阿積士追平。去到補時3分鐘，馬賽再獲12碼，奧巴美揚操刀攻入個人第3球，為馬賽「絕殺」4比3。
奧巴美揚今季法甲只得1個入球，表現備受批評，但佢喺今屆歐洲賽(歐聯附加賽/歐霸盃)已入7球，同時亦追平哥倫比亞前鋒法卡奧紀錄，成為第2個喺歐霸盃3連上演帽子戲法嘅球員。馬賽教練加度素賽後表示：「佢最近入球荒當然會面對好多批評，尤其係馬賽球迷，但我從來冇質疑奧巴美揚嘅能力。」