【有片】曼聯棄將轟入世界波 搶C朗風頭
2023年12月23日 13:02
東網電視
更多新聞短片
阿歷士迪尼斯凌空抽射入網。(Getty Images)
去片睇阿歷士迪尼斯轟入世界波
周五(22日)深夜沙特阿拉伯聯賽，艾納斯以3比1擊敗伊蒂法克，C朗入1球及1次助攻，但都唔及另一位前曼聯球員阿歷士迪尼斯搶眼，呢位巴西左閘凌空轟入世界波，技驚四座。
艾納斯狀態回勇，過去2場都贏波兼合共入9球，今仗踢到43分鐘，出現精彩一幕，阿歷士迪尼斯把握對手頭槌解圍，離門大約25碼，凌空抽射入網打開紀錄。呢位31歲「帶刀侍衞」曾經為曼聯上陣30場英超都冇波入，加盟艾納斯後踢12場聯賽已入2球。
換邊之後，輪到C朗表演，佢先係頭槌二傳畀波索域射入，跟住自己主射12碼入網，即使比賽未段艾納斯被對手追番1球，都無礙全取3分，現時落後榜首希拉爾10分，但踢少1場。
值得一提，C朗今年各項賽事已經入51球及15次助攻，僅落後哈利卡尼、基利安麥巴比1球，以及多艾寧夏蘭特1球，由於拜仁慕尼黑及巴黎聖日耳門已完成今年所有賽事，加上夏蘭特有傷，C朗可以把握艾納斯今年餘下2場比賽，爭取成為2023年入球王。