東網電視
更多新聞短片
羅拔利雲度夫斯基已35歲。(Getty Images)
波蘭前鋒羅拔利雲度夫斯基今季表現下滑，雖然仍然有8球成為隊中首席射手，但入球產量同戰術作用都受到質疑，據報「羅拔仔」合約內有加薪條款，明年人工將增加520萬鎊(約5,200萬港元)。巴塞正研究阻止條款生效，好大機會提前將呢位老將賣走。
「羅拔仔」2022年夏天由拜仁慕尼黑加盟，由於巴塞受到財政問題所限，呢位波蘭前鋒簽署嘅3+1年合約，人工採用每年遞增方式，上季年薪係1,730萬鎊(約1.73億港元)，今季加至2,250萬鎊(約2.25億港元)，下季開始嘅第3年合約，人工將會再增加520萬鎊。
據西班牙《每日體育報》消息，巴塞教練沙維對「羅拔仔」嘅防守效率表示不滿，上場聯賽贏艾美利亞，沙維半場期間就同「羅拔仔」發生爭執。報道指巴塞唔想養住高薪兼唔啱用嘅球員，打算喺加人工條款啟動前將35歲嘅「羅拔仔」賣走。
