些路迪撬利物浦2號門將　高普打定輸數　

利物浦青訓出身嘅愛爾蘭門將基利靴，近日受到至少3支英超隊及蘇超班霸些路迪斟介，紅軍領隊高普已作好基利靴離隊嘅準備，等待最終結果。

基利靴現年25歲，2019年獲提拔上一隊，一直擔任2號門將，4季半以來僅上陣32場，失41球，12次保持清白，今季為利物浦上陣11場，現時估計身價為1,500萬歐元(約1.28億港元)。

《每日郵報》及多間傳媒報道，基利靴獲些路迪垂青，因為些路迪36歲門將赫特將於今季約滿，須物色接班人，會方希望搵基利靴接班。由於利物浦1號門將艾利臣比加表現穩定，基利靴上陣機會不大，該球員亦希望轉換環境，尋求突破，高普好難留人。

利物浦表明，只接受合理報價才會出售球員，高普亦已做好兩手準備，一旦基利靴離隊，就會簽入後備門將，佢初步睇中英冠新特蘭門將安東尼柏達臣，隨時會出手。