東網電視
更多新聞短片
高爾彭馬(左)連番失機。(Getty Images)
周六(27日)凌晨英足盃第4圈另1場焦點之戰，車路士主場只能同阿士東維拉打和0比0，需要重賽。車仔原本好大機會贏波，但係中場高爾彭馬連番失機，包括單刀起腳唔入，激到領隊普捷天奴紮紮跳。
車路士剛於周中打入英聯盃決賽，球員匆匆再戰，體力難免比較輸蝕，阿士東維拉開賽初段，取得較大優勢，包括中場泰利文斯近門頂頭槌，被車仔門將柏度域救出，杜格拉斯雷斯射門入網，但因為犯手球在先，被判無效。
車路士避過一劫，逐漸搶回唔少攻勢，但係高爾彭馬連番起腳，都無攻而還，當中最離譜係截到對手誤傳之後，喺禁區內無人管之下射門，卻被維拉門將達米安馬天尼斯擋出，激到領隊普捷天奴即時彈起大嗌。
高爾彭馬今場有4次射門，但都未能轉化成入波，值得一提，車路士早前英聯盃4強首回合對米杜士堡，高爾彭馬試過離門5碼，面對空門射高，今仗英足盃又成為「大嘥鬼」。
此外，雙方門將柏度域、達米安馬天尼斯都有神勇演出，各有5次撲救，力保不失，注定需要重賽。
