東網電視
更多新聞短片
禾美倫前途無可限量。
馬德里體育會喺轉會市場有重大收穫，會方正式宣布同比甲球隊安特衛普達成協議，簽入對方18歲中場新星禾美倫，雙方簽下6年半長約，據悉轉會費為2,200萬歐元(約1.87億港元)，呢位比利時國腳被譽為「新迪布尼」，前途無可限量。
禾美倫屬於安特衛普青訓產品，年紀輕輕近2季已成為主力，協助球隊奪得上季比甲冠軍，得以參加今屆歐聯。雖然安特衛普喺歐聯分組賽6戰僅1勝5負出局，但禾美倫仍然有出色表現，包括最後1輪主場對巴塞隆拿，開賽2分鐘就入波，協助安特衛普爆冷贏3比2。
禾美倫上年10月已晉身比利時大國腳，被認為係奇雲迪布尼嘅接班人，引起多間大球會關注，曼聯，阿仙奴、馬體會紛紛出手斟介，最終由馬體會勝出，禾美倫將會着18號球衣。
