東網電視
更多新聞短片
域陀洛基連續2仗入波。(Getty Images)
巴塞隆拿教練沙維宣布季尾離隊後，球隊表現持續復甦，周日(4日)西甲作客3比1擊敗艾拉維斯，落後踢少場嘅「1哥」皇家馬德里7分。冬天加盟嘅巴西新星域陀洛基，今場後備上陣12分鐘就入波兼食紅牌，好在冇影響巴塞贏波。
巴塞喺22分鐘先開紀錄，羅拔利雲度夫斯基接應根度簡直線，巧妙笠過艾拉維斯門將入網。主隊之後傾力反撲但未能入波，巴塞就喺49分鐘由根度簡邊走邊射窩利抽入，艾拉維斯3分鐘後追番1球，不過後備上陣嘅域陀洛基63分鐘禁區內射成3比1。呢位巴西前鋒72分鐘喺一次爭搶中，爭議性拎第2面黃牌被逐，落場短短12分鐘就入波兼領紅，巴塞最終保住3比1戰果至完場。
繼上場贏奧沙辛拿後，巴塞喺沙維宣布離隊後2連勝，沙維賽後表示：「呢個係球員畀我嘅回應，我哋好努力並拎走3分，呢種效率係球隊今季一直欠缺，贏波令到球員更有信心。」沙維亦表明會為域陀洛基嘅紅牌提出上訴。
