柏迪未復出又受傷　阿仙奴生涯提早玩完？

阿仙奴中場湯馬士柏迪自從上年10月中受傷之後，一直缺陣，領隊阿迪達透露，呢位30歲加納國腳近日又出現新傷患問題，未知幾時可以復出，盛傳湯馬士柏迪可能今夏離隊，佢嘅兵工廠生涯隨時提早玩完。

阿仙奴周一(5日)凌晨英超主場對榜首利物浦前夕，主帥阿迪達表示，湯馬士柏迪未能入選大軍名單：「好不幸湯馬士早幾日又受傷，唔可以參加比賽，仲未知道佢需要休息幾耐，可能係幾日，亦可能係幾個星期，佢覺得傷勢同之前相似。」湯馬士柏迪今季僅為阿仙奴上陣4場英超。

阿仙奴簽入迪格蘭賴斯之後，已經傳出可能出售湯馬士柏迪，加上佢今季受傷患問題困擾，進一步增加被球會放棄嘅可能性。據悉意甲勁旅祖雲達斯有意簽入湯馬士柏迪，問題係佢已經變成「玻璃腳」，可能影響轉會交易。