國際米蘭大勝領先10分　球證都被征服

周六(17日)凌晨意甲「首尾之戰」，榜首國際米蘭主場以4比0大勝包尾嘅沙蘭力坦拿，大幅拋離第2位祖雲達斯10分，冠軍十拿九穩。國米今仗一早奠定勝局，球證罕有決定唔補時，一到90分鐘就吹完場，似乎唔想浪費大家時間，難怪網民都驚嘆「藍黑兵團」壓倒性實力，連球證都被征服。

雙方實力距離懸殊，開賽17分鐘，國際米蘭就由馬古斯杜林射入打開紀錄，僅過2分鐘，另1位前鋒拿達路馬天尼斯發威，勁射入網，迅速拉開紀錄。值得一提，兩個入波都係來自卡路士奧古士圖嘅助攻。

踢到40分鐘，杜費斯近門補射入網，國際米蘭上半場已經領先3球，加上後備上陣嘅阿拿奧杜域90分鐘射成4比0，球證比斯尼利都認定勝負已分，立即吹完場。

事實上，國際米蘭佔盡上風，全場有26次射門，沙蘭力坦拿只有1次射門，球證唔補時，總算可以減少客隊球員喺場上「受苦」時間。國米踏入2024年之後，各項賽事8戰全勝，為下周中歐聯16強首回合主場馬德里體育會壯行色。