摩連奴重返英超條件曝光　組建25億大軍

摩連奴今夏好大機會再戰英超，不過唔係再度入主車路士或曼聯，而係執教擁有沙特財團做後盾嘅紐卡素，據報佢已透過中間人向「喜鵲」開出條件，包括年薪1,500萬歐元(約1.27億港元)，最重要係有3億歐元嘅組軍預算(約25.4億港元)。

好多人話61歲嘅「寸王」已經過氣，但佢執教中型班羅馬兩季半，連續兩年歐戰打入決賽，展示領軍能力，佢認為羅馬喺聯賽成績唔好係因為班主唔識足球，又太孤寒唔肯花錢買人。

早前接受里奧費迪南訪問，摩連奴已否定重掌曼聯教鞭可能性，認為曼聯高層唔肯按照佢心意組軍，「寸王」打算重新建立球隊，條件係班主擁有無限金錢，似乎紐卡素最適合佢。

《鏡報》報道，摩dad已透過中間人向紐卡素開出條件，合約為期3年，年薪1,500萬歐元，並提供3億歐元組軍資金，上述條件紐卡素都有能力滿足，不過為避免違反財政公平法案，今夏勢必大換血，出售捷比亞、哥林威爾遜、般奴古馬雷斯等主力，畀摩連奴足夠空間大展拳腳。