東網電視
更多新聞短片
港超球隊理文為力爭首個聯賽冠軍，今季大肆擴軍，包括簽入愛沙尼亞國腳安尼亞（Henri）。此子加盟後表現對辦，更憑其健碩身形在前線衝鋒陷陣，跟自己名字讀音一樣的日本動漫角色「安妮亞」一樣，迅速成為人見人愛的球迷寵兒 ！圖/文：林卓臻／李浚湣
職業生涯足跡遍佈歐亞的安尼亞，視代表愛沙尼亞披甲為榮。（林卓臻攝）
現年33歲的安尼亞，出生於愛沙尼亞首都塔林（Tallinn），這個地方對香港人來說或許有點陌生，但當提到這個已多年未返的家鄉時，Henri面上卻藏不住笑意：「塔林人口唔多，係一個好靚嘅城市，擁有全歐洲最浪漫嘅聖誕市集。塔林算係近海，交通都好方便，風格同香港截然不同，歡迎大家嚟旅行。」性格冷漠相信是很多人對北歐人的刻板印象，惟滿面鬍子的Henri私底下卻完全相反，與記者、球迷和理文職球員可謂沒有隔膜，他笑稱：「我都認同自己性格唔似典型北歐人，可能因為近年喺唔同國家踢波，同好多人相處過，加上成日要獨自飛嚟飛去，社交對我嚟講好重要。」
季初代表理文赴日本出戰「亞冠盃」外圍賽，站在東京南池袋公園的安尼亞，對新挑戰充滿期待。（林卓臻攝）
安尼亞年少時已展現出極高足球天份，以及具備出色的射門觸覺，2009年夏天獲意大利老牌球隊森多利亞的青年軍邀請加入：「當時我得17歲仲讀緊書，未確定足球係我嘅職業，但喺一場U21歐國盃外圍賽幫愛沙尼亞贏咗瑞士，之後森多利亞就話對我有興趣，仲限3日之內要答覆。嗰陣我英文唔算好好，仲要離開家人、朋友，對我嚟講好困難。」然而Henri最終決定外流，這段經歷對他來說亦相當難忘：「足球喺意大利好受歡迎，我一去到即刻成為焦點，接受咗好多訪問。自己一星期仲會跟一隊練兩日波，當時森多利亞有柏仙尼、卡斯辛奴等球星，普通練波都有2,000人睇。」
安尼亞（右）的衝撞型踢法，令不少港超後衞吃盡苦頭。（林卓臻攝）
在亞洲打滾多年的安尼亞，今季首戰港超表現並不失禮，季初面對勁旅傑志更個人梅開二度，他直言理文好像一個大家庭，自己亦十分享受在此效力的時光。「黃黑軍團」暫時在聯賽未嘗一敗，力壓傑志排榜首，Henri強調爭冠仍有漫漫長路，最重要是保持耐性及健康身體，又重申港超每一隊皆不容小覷：「任可一支球隊都有機會贏波，通常每場波都會有5至6人喺禁區圍住我，入波有難度，要好認真踢。」除此之外，Henri又不忘分享道在加盟理文前的一段小插曲：「前年大約12月，經理人提到有本地球隊向我招手，但當時同蒙通聯仲有合約，泰國當地又有球會對我有興趣，加埋對香港認識唔深，所以最終唔成事。」
安尼亞不敢輕視港超任何對手。（林卓臻攝）
【安尼亞檔案】
姓名：Henri Anier
出生日期：1990年12月17日（33歲）
國籍：愛沙尼亞
位置：前鋒
身高：1米83
球衣號碼：9
曾效力球隊（只列部分）：維京、登地聯、馬瑟韋爾、水原FC、蒙通聯
現效力球隊：理文
安尼亞（右）為愛沙尼亞上陣逾90次，國際賽經驗豐富。（Getty Images）
安尼亞2011年首次為愛沙尼亞國家隊上陣，至今踢了超過90場比賽，更排在國家隊神射手榜第4位，他承認每次國際賽期，由香港飛返歐洲踢國際賽的確感到疲倦：「搭十幾個鐘長途機真係好攰，除咗時差，氣候都要適應，因為歐洲負幾度，同香港相差成十幾度咁多。」惟Henri卻指代表國家隊披甲屬於一種職責、榮譽，自己對於即將舉行的歐國盃附加賽相當期待，盼能夠盡力爭取入球，兼帶領球隊首躋決賽周。
球迷會為安尼亞送上「安妮亞」精品，熱情地提點他與人氣動漫主角「撞名」，對此Henri感覺新奇。（林卓臻攝）
除了國家隊層面，安尼亞亦曾在歐洲球壇與世界級球星正面交鋒，當被問到遇過最難纏的後衞時，他毫不遲疑地回答：「效力馬瑟韋爾期間，好記得對住些路迪，當時唔太認識雲迪積克，但當第一次同佢身體對抗之後，我就知佢一定會成為世界上最出色中堅。當然佢好快就加盟咗利物浦，同我好友卡拉雲做咗拍檔。」
職業生涯足跡遍佈歐亞的安尼亞，視代表愛沙尼亞披甲為榮。（林卓臻攝）
安尼亞不敢輕視港超任何對手。（林卓臻攝）
季初代表理文赴日本出戰「亞冠盃」外圍賽，站在東京南池袋公園的安尼亞，對新挑戰充滿期待。（林卓臻攝）
球迷會為安尼亞送上「安妮亞」精品，熱情地提點他與人氣動漫主角「撞名」，對此Henri感覺新奇。（林卓臻攝）
安尼亞（右）的衝撞型踢法，令不少港超後衞吃盡苦頭。（林卓臻攝）
安尼亞（右）為愛沙尼亞上陣逾90次，國際賽經驗豐富。（Getty Images）
