澳洲領隊落柯打　蘇達亞夏天離開李城

澳洲喺世盃外亞洲區I組3戰全勝，不過如果佢哋想更進一步，中堅哈里蘇達亞嘅演出舉足輕重。呢位2米巨人唔單止喺防線一柱擎天，進攻亦係澳洲嘅得分法寶，不過佢今季喺李斯特城長坐冷板，澳洲領隊艾萊特日前就落柯打，叫蘇達亞夏天轉會。

現年25歲嘅蘇達亞喺蘇格蘭出世，目前係澳洲攻守核心，司職中堅嘅佢，喺澳洲28次上陣竟然入咗11球，比佢職業生涯所有球會入球加埋更多，但佢今季只踢過98分鐘聯賽，向來着重球員上陣時間嘅艾萊特就承認為佢破例：「蘇達亞對我哋太重要，我哋依家所做就係為佢事業着想，借國際賽畀佢有上陣機會。」

不過，艾萊特強調「特權」唔係永久，下令蘇達亞夏天要離開李斯特城：「呢個情況唔可能永遠持續，蘇達亞要解決問題，下一個轉會窗對佢非常關鍵，一切視乎佢嘅心態。」