港超聯　大埔1球挫10人深水埗

「中銀人壽香港超級聯賽」周日（14日）假深水埗運動場上演地區打吡，深水埗回師主場挑戰大埔。結果大埔憑雷仙奴下半場攻入全場唯一入球，以1比0擊敗比賽後段有宋柱浩兩黃一紅被逐的深水埗。

深水埗今場派出小田倉康太及顏卓彬坐鎮中場，支援蘇沙、張廣然及鄧嘉進攻三叉戟攻堅；大埔後防收起馬高斯山度士，由加比爾及謝臣夥拍中堅，前線有盧卡斯擔任箭頭，陳肇鈞及比迪高提供中場支援。

大埔開局反客為主，8分鐘馬卡雷拿的射門，省中禁區內宋柱浩手部，球證到場邊看完VAR後直指12碼點，不過陳肇鈞操刀宴客，被梁興傑撲出。深水埗其後搶回不少攻勢，35分鐘，波比高波傳入禁區，顏卓彬接應一頂，被謝家榮沒收，雙方半場互無紀錄。

換邊後，大埔率先打破僵局，比迪高送出直線，雷仙奴一射得手，為「綠戰士」65分鐘取得領先優勢。71分鐘，盧卡斯推橫禁區頂起腳射個地波，被梁興傑沒收。深水埗再換入基奧加強攻勢，但效果一般，85分鐘更因宋柱浩侵犯陳肇鈞，被球證兩黃一紅驅逐，要10人應戰。結果大埔將1比0勝局保持到完場，聯賽取得4連勝，兼升上積分榜第3位。

賽後大埔主教練李志堅承認今場贏得艱難，指出球隊不乏入球機會，可惜未能好好把握，認為球隊上了寶貴一課：「今年大埔重組，大家都未必預期我哋可以行到呢步，呢個時候就需要學習，點樣去面對壓力，好彩今日捱過咗。」

對於宋柱浩被逐離場，深水埗主教練陳浩然賽後一度與球證張煒隆議論：「唔知球證點樣定批踭，因為批踭係應該直紅，但佢只係畀咗黃牌，除咗呢場之外，下場波我都少咗位球員，唔係好明佢嘅解釋。」陳浩然認為球隊態度仍值得嘉許：「我哋聯賽排名第9，對第3嘅球隊踢成55波，今日球隊嘅精神面貌，係咁多場波中最好嘅一場。」