【有片】冇奇迹！利物浦贏波出局　沙拿敗家

周五(19日)凌晨歐霸盃8強次回合，利物浦作客阿特蘭大開靚個頭，7分鐘就打開紀錄，可惜最終無以為繼小勝1比0，兩回合合計輸1比3出局。穆罕默德沙拿今場錯失單刀成為罪人，不過領隊高普就拒絕責怪，話好滿意球隊今場表現。

雖然首回合輸0比3，不過利物浦過往有唔少神奇反勝事迹，4年前歐聯亦作客贏過阿特蘭大5比0，所以唔少利迷都充滿期待。「紅軍」今場開個靚頭，7分鐘就由沙拿射入12碼，大把時間收復失地，上半場尾段沙拿再有單刀，但佢嘅笠射「離行離迾」，浪費黃金機會。下半場利物浦體力下降，連攻勢都做唔到，最終只能小勝1比0，贏波出局。

沙拿單刀失機片段：https://twitter.com/i/status/1781045700903457205　

高普賽後表示：「我哋出局唔係因為今場，而係輸喺首回合，阿特蘭大值得晉級。我鍾意利物浦今場開局表現，如果入到第2球當然有幫助，我對出局失望，但並唔憤怒。」對於沙拿受到猛烈批評，高普就力撐：「我唔擔心沙拿，前鋒就係會有狀態起伏，佢嘅人生唔係第1次單刀失機，我唔會為呢次冇運射門小題大造。」