車路士大鑊　高爾彭馬病咗唔出得

車路士喺英足盃出局後，今季肯定「四大皆空」，不過前鋒高爾彭馬近5場聯賽入10球，一口氣衝上射手榜榜首，依家同艾寧夏蘭特並列射手榜第1位（20球），本來有機會爭番個金靴獎，但臨開波前迎來壞消息，彭馬仔因病差不多肯定缺陣今場「倫敦打吡」。

車仔領隊普捷天奴喺賽前記者會，特別提到高爾彭馬因病缺席操練，被問到能否對阿仙奴上陣，普帥表示：「如果以呢日情況睇，我會話『No』。我哋比賽日朝早會睇吓個進展係點，但以今日情況預計，我唔相信佢可以踢。不過即使彭馬個病好番，佢都未必有狀態去比賽。」

高爾彭馬今季各項賽事為車路士射入23球及貢獻13個助攻，係車仔嘅進攻泉源，球隊冇咗佢肯定影響甚大。此外，普捷天奴亦透露，芝維爾及馬路古斯圖亦未能於今場「倫敦打吡」上陣。