曼聯兩大主力有心病　海倫不滿般費唔傳波

曼聯狼狽打入英足盃決賽，表現備受批評，根據英國《每日郵報》爆料，紅魔鬼兩大主力海倫同般奴費南迪斯有「心病」，海倫曾經向領隊坦哈格投訴般費未有提供足夠傳送畀佢，導致呢位荷蘭名帥左右做人難。

海倫今季加盟曼聯後，季初曾多場比賽白果，據悉呢位丹麥國腳當時向坦哈格抱怨般奴費南迪斯唔傳波畀佢。曼聯上年11月歐聯分組賽作客哥本哈根，海倫同達洛治發生爭吵，般奴費南迪斯力撐同屬葡萄牙國腳嘅達洛治，加深海倫同般費嘅裂痕。海倫曾經向坦哈格求助，擔心自己同隊友相處出現問題，坦哈格反而叫佢直接同達洛治「拆掂佢」，幸好兩人最終和解。

海倫曾於今年1月至2月連續6場入波，但其後不幸受傷，佢復出後，近6場以正選上陣都食白果，而且射門次數甚少，明顯得唔到隊友支援。睇番海倫今季13個入波，只有6球來自隊友直接助攻，其餘都係靠自己力量，甚至對手犯錯，取得入波，可以話係孤軍作戰。