阿仙奴賤賣柏迪　標呢個價

湯馬士柏迪已經淡出阿仙奴主力陣容，今季上陣12場0球0助攻，即係冇咗佢都冇所謂，據報「兵工廠」打算將佢出售，轉會費標價2,000萬至2,500萬鎊(約1.96億至2.45億港元)。

《Football Insider》報道，湯馬士柏迪2020年由馬體會加盟，當時阿仙奴為佢支付4,500萬鎊解約金，一度係球隊中場重要一員，不過4個球季以來柏迪不斷受傷患同場外事情纏擾，球隊成績亦受影響，嚟到今季阿迪達唔再重用佢，球隊一樣有好成績。

報道指阿仙奴打算平價出售柏迪，中場空缺亦有目標人選，就係阿士東維拉嘅杜格拉斯雷斯，該位巴西中場今季表現神勇，各項賽事交出10入球10助攻，據報其身價上升到7,000萬歐元(約5.8億港元)，非常昂貴，出售柏迪之後，阿仙奴要大幅補水先買到佢。