利物浦同意9200萬「贖人」　施洛將成新領隊

利物浦聘請新帥接替將於今夏離隊嘅高普，取得突破性發展，根據「轉會權威」記者羅曼諾(Fabrizio Romano)及英國各大傳媒爆料，紅軍已經同飛燕諾達成協議，向呢支荷甲球隊支付940萬鎊(約9,200萬港元)賠償金，從而簽入對方主帥施洛，預料將於短期之內正式宣布。

利物浦之前斟介2位新帥目標沙比阿朗素、魯賓艾摩廉，都未能成功，繼而轉斟施洛，而且進展非常快，皆因呢位45歲荷蘭光頭名帥渴望加盟紅軍，早前更呼籲飛燕諾放人。最新消息指飛燕諾考慮到施洛去意已決，同意利物浦開出嘅940萬鎊「贖身費」，當中有770萬鎊係固定費用，另有170萬鎊屬於浮動費用，施洛嘅助教侯素夫亦會一齊加盟利物浦。

施洛曾經執教過荷甲球隊阿爾克馬爾，2021年轉投飛燕諾，領軍獲得2021/22年度歐協聯亞軍，最威水係奪得上季荷甲冠軍，今季亦已捧走荷蘭盃冠軍，現時聯賽排第2位，落後榜首燕豪芬9分。