大哨出售高士路　淨賺2.34億

巴西名宿「大哨」朗拿度日前宣布，出售巴甲球隊高士路90%股權，售予當地一名商人，據報呢筆交易令「大哨」兩年間賺咗3,000萬美元(約2.34億港元)。

「大哨」掛靴後從商，擔任西班牙球隊華拉度列班主，2021年底買入當時仲喺巴乙嘅高士路90%股權，成為球隊班主，當時買入價8,000萬美元。

經營球隊兩年幾之後，「大哨」決定賣盤，據報賣盤原因係球隊成績未如理想，球迷唔滿意，令佢兩面不討好，近日有買家願意以1.2億美元收購佢手上90%股權，佢決定放手。

總計今次買賣，「大哨」用8,000萬美元買入球隊，期間對球隊1,000萬美元經費投入，球隊由巴乙升上巴甲，兩年多之後以1.2億美元出售，盈利為3,000萬美元。

據「大哨」喺IG留言指，新買家柏連奴係巴西第5大零售商，亦即高士路繼續有大水喉射住，現時球隊喺巴甲開季4戰2勝1和1負排第7，開局順利，而「大哨」賣盤後仍然留喺董事局，係球隊一分子。