美斯瘋狂創造6球　國際邁亞密大炒紐約紅牛

周日(5日)早上美職，阿根廷球王美斯大發神威，個人創造6球，包括射入1球及5次助攻，協助國際邁亞密以6比2大勝紐約紅牛，同喺沙特聯賽上演「完美帽子戲法」嘅宿敵C朗互相輝映。

國際邁亞密一開波就搶攻，但30分鐘被紐約紅牛反擊得手，導致上半場落後0比1。換邊後，國際邁亞密展開大反擊，美斯傳畀洛查士射入扳平，跟住自己亦入1球，幫國際邁亞密反超前2比1。

轉個頭，美斯再次妙傳洛查士建功，呢位36歲阿根廷國腳當然冇忘記好拍檔蘇亞雷斯，連續3次助攻「哨牙蘇」入波，造就呢位烏拉圭前鋒完成「帽子戲法」。至於紐約紅牛補時入番1球12碼，對戰局已無關痛癢，美斯單場創造6球，打破美職紀錄。

美斯今季為國際邁亞密各項賽事上陣11次，射入12球及11次助攻，職業生涯累積創造入球突破1200大關，達到1205球，包括球會及國家隊賽事合共入833球及372次助攻。

國際邁亞密取得聯賽4連勝，排東岸榜首，展現冠軍相。