曼聯豆腐防線　失波數字等於意甲降班球隊

曼聯慘吞水晶宮4蛋後，今季各項賽事已經合共失81球，竟然同意甲包尾球隊沙蘭力坦拿睇齊，並追平1976/77年球季，成為曼聯近47年以來，單季最多失波數字。如果單計英超，紅魔鬼今季聯賽失55球，距離球隊喺英超成立以來，單季聯賽最多失球紀錄，只差2球，餘下3場聯賽，好大機會再創恥辱紀錄。

根據Sofascore統計，今季歐洲5大聯賽球隊之中，各賽事總失波數字最多一隊係錫菲聯(105球)，緊隨其後係盧頓(89球)、韋斯咸(86球)，曼聯同沙蘭力坦拿並列第4位，都係失81球。最諷刺係沙蘭力坦拿已經篤定提早降班，難怪網民紛紛嘲諷曼聯防線屬於「降班級數」。

此外，曼聯喺英超史上單季聯賽最多失波紀錄係2021/22年球季，該季失57球，今季聯賽已失55球，餘下3場英超要對阿仙奴、紐卡素、白禮頓，恐怕唔止2球。