愛華頓瀕臨破產　面臨再扣9分

根據英國《太陽報》爆料，愛華頓已經非常接近破產，如果最終成真，將會被自動扣聯賽9分，但問題在於到底係扣今季積分，抑或下季執行追扣，成為球隊未來發展關鍵。

愛華頓現時債務達到5.83億鎊(約57億港元)，加上原本有意收購「拖肥糖」嘅美國財團777投資公司，因為捲入商業詐騙案，導致交易失敗。如果愛華頓班主莫舒利未能搵到新買家接手，球會就好大機會破產，會被自動扣聯賽9分。

愛華頓因為財政違規，今季英超已被扣8分，球隊喺周六(11日)晚聯賽憑杜哥利入波，主場以1比0擊敗錫菲聯之後，現時領先尾三盧頓14分，剩下1輪聯賽，即使再扣9分，都唔會降班。不過，如果下季先至追扣9分，愛華頓新一季就要由負分開始，前景會非常暗淡。