唔使降班仲可以踢歐聯　巴克里有望加盟維拉

盧頓已經篤定下季降落英冠，但中場主力巴克里今季表現出色，獲得多間球會垂青，根據「轉會權威」記者羅曼諾(Fabrizio Romano)爆料，阿士東維拉已經接觸呢位30歲英格蘭球星，雙方有望達成加盟協議，一旦成事，巴克里下季唔止唔使降班，仲可以踢歐聯。

巴克里上年夏天由法甲球隊尼斯轉投盧頓之後，獲得重生，踢32場英超入5球及4次助攻，重拾當年效力愛華頓時期嘅顛峰水平。據悉維拉領隊艾美利非常欣賞巴克里，認為佢技術細膩及經驗豐富，簽入佢有助提升球隊實力，特別係維拉將於下季出戰歐聯，急需要增兵，巴克里已成為艾美利嘅頭號目標。

巴克里上月已經表明，如果盧頓降班，佢就會離隊：「我想踢英超同歐洲賽，我認為自己未來3年仍然可以處於高水平狀態。」巴克里同維拉眉來眼去，雙方有望一拍即合。