沙特新貴升班即大搞　斟摩連奴同文尼

沙特聯賽球會富甲一方，下季升上沙特超嘅艾卡迪斯亞(Al-Qadsiah)，據報將會「大搞」同列強爭霸，目標包括艾納斯前鋒沙迪奧文尼，另外仲想請「寸王」摩連奴出任總監。

艾卡迪斯亞上季喺甲組聯賽稱霸，升班後雄心勃勃，之前傳過想簽貝迪斯中場費基亞同利物浦中堅華基爾雲迪積克，據《Wiwsport》報道，佢哋依家計劃簽艾納斯前鋒沙迪奧文尼，呢位塞內加爾前鋒上季加盟艾納斯後表現未如預期，30場聯賽只入13球，艾納斯亦唔介意將佢放走。

除咗收購球星之外，意大利傳媒指艾卡迪斯亞亦打摩連奴主意，但唔係搵佢執教，而係出任球會技術總監一職，負責艾卡迪斯亞升班後嘅全盤發展計劃。摩連奴早前曾表示有興趣去沙特工作，對於呢個全新工作持開放態度。