麥堅拿同意上車　葉士域治索賠3,900萬

車路士辭退普捷天奴後要搵新帥，其中葉士域治38歲少帥基蘭麥堅拿是候選人之一，據報該北愛教頭同意「上車」，葉士域治將要求400萬鎊以上(約3,900萬港元)賠償。

《晚旗報》報道，基蘭麥堅拿剛協助葉士域治衝超成功，來季升上英超，當得知車路士今夏換帥，並將自己列為候選人之一時表示歡迎，對於接手車路士很感興趣，希望執教生涯更上一層樓。

另邊廂，葉士域治希望基蘭麥堅拿留隊，雙方合約至2027年，成功升班後會方已向基蘭麥堅拿提供一分新合約，如果車路士堅持搶人，葉士域治將要求超過400萬鎊賠償。

基蘭麥堅拿是否執教車路士仍有一個變數，就係車路士同時將剛離開白禮頓嘅迪薩比列作候選人，如果最終車路士選擇迪薩比，白禮頓將會向基蘭麥堅拿招手。

其實基蘭麥堅拿之前做過曼聯助教，先後擔任摩連奴、蘇斯克查同蘭歷克副手，並且用兩年半時間帶領葉士域治由英甲幾乎降班，到依家重返英超，新季英超無論佢教邊隊，大家都可以睇到佢執教有幾神奇。