盧連患乙流被「隔離」　歐聯決賽上陣成疑

皇家馬德里喺歐聯決賽前遇上難題，大軍周四(30日)出發倫敦備戰，不過烏克蘭門將盧連將唔會一齊出發，據報佢近日感染乙型流感，依家被禁止同其他球員接觸，以免疫情爆發，盧連可唔可以踢歐聯決賽成為疑問。

據西班牙傳媒報道，盧連日前感染乙型流感並出現發燒，已缺席球隊2課操練，皇馬大軍周四出發去倫敦備戰，盧連就被禁止隨隊出征，以免惹埋其他球員。據報盧連如果病情好轉，有機會喺周五(31日)或者周六(1日)去會合球隊。

不過，就算盧連順利康復，佢會唔會喺決賽做正選都有疑問，事關正選門將泰拔高圖爾斯復出後，狀態唔錯，教練安察洛堤日前表示，盧連同泰拔高圖爾斯都值得踢決定，邊個擔正暫時未有最終決定。