東網電視
更多新聞短片
阿諾特踢中場表現出色。(Getty Images)
英格蘭展開歐國盃備戰之旅，周二(4日)凌晨喺聖占士公園球場出擊，主場3比0大勝波斯尼亞。英格蘭今場試陣為主，雖然結果係贏3比0，但整體發揮唔見突出，最搶鏡係移任中場嘅阿歷山大阿諾特，佢亦以一個精彩窩利入波作回報，有望搶佔正選位置。
英格蘭今仗半力出擊，伊比爾治伊斯、高爾彭馬、查洛保雲同奧尼屈堅斯組成進攻線，不過上半場表現麻麻冇乜威脅，直到60分鐘先因對手禁區內拉衫獲得12碼，由高爾彭馬操刀打破僵局。英格蘭去到尾段入多2球，85分鐘阿歷山大阿諾特接應基亞利殊傳中，右路窄角度窩利抽入遠柱；4分鐘後哈利卡尼門前執雞，湊成3比0大捷。
喺利物浦踢開右閘嘅阿諾特，今仗以中場身份上陣，佢嘅傳送同創造力係英格蘭今場亮點之一，而且仲有靚入波加分，有望成為迪格蘭賴斯嘅中場拍檔。英格蘭領隊修夫基賽後表示：「今場好多球員都比較少上陣，所以開局表現麻麻，開紀錄之後就愈踢愈好，我依家有好多選擇，係個幸福嘅煩惱。」
