泰國贏唔夠3粒　中國輸波驚險出線

周二（11日）世盃外亞洲區第2圈C組尾輪，先開波嘅中國只要和波便可出線情況下，作客以0比1不敵南韓，幸好同組泰國只以3比1擊敗新加坡，令中國驚險獲次名進身下一圈，保住出線2026年世盃決賽周機會。

國足上場幸運地逼和泰國1比1，今仗要造訪一早鎖定首名出線嘅勁旅南韓，只要唔輸便取得次名，亦排出血肉長城，頂住有孫興民領軍嘅「太極虎」連番攻勢，可惜久守必失，被李康仁下半場61分鐘一箭定江山，以0比1飲恨，意味住泰國只要淨勝新加坡3球，便可出線。

不過，遲90分鐘開波嘅泰國，雖然睇定嚟食，但無奈佢哋把握力唔掂，仲要失咗1球，最終主場只以3比1擊敗新加坡，在同得8分，雙方得失球同樣0球，中國憑較佳對賽成績力壓泰國，保住次名驚險進身下一圈。

今屆世界盃擴軍至48隊，亞洲區獲分配8.5個名額，相當充裕，中國出線後躋身18強賽，如要出線非要有進步演出不可。