C朗復出轟入2球　葡萄牙大勝愛爾蘭

周三(12日)凌晨國際熱身賽，葡萄牙巨星C朗缺陣2場之後，今仗強勢復出，立即射入2球，將國家隊入波紀錄增加至130球。葡萄牙最終大勝愛爾蘭3比0，為出戰下周三(19日)凌晨歐國盃首輪分組賽對捷克壯聲威。

葡萄牙前2場熱身賽對芬蘭、克羅地亞，C朗獲得休息，今仗係歐國盃展開前最後1場熱身賽，領隊馬天尼斯派出強陣，包括C朗復出擔任正選。開賽冇耐，葡萄牙就打開紀錄，般奴費南迪斯妙傳畀祖奧菲歷斯射入。

換邊之後，成為C朗表演時間，包括50分鐘喺禁區右路，起左腳射遠柱死角入網，非常精彩。10分鐘之後，呢位39歲老將再入1球，個人梅開二度。值得一提，C朗比賽初段曾經主射罰球省中人牆，再中柱彈出，錯過上演「帽子戲法」機會。

C朗本身已經係男足國際賽史上最多入波球員，今仗轟入2球之後，再將紀錄改寫為130球。賽後C朗喺社交網話：「偉大勝利，向歐國盃進發！」葡萄牙位處歐國盃F組，對手包括捷克、格魯吉亞、土耳其，相信出線冇難度。