【有片】好黑暗！卡塔爾靠「鬼球」踢印度出局

去片睇「鬼球」https://twitter.com/i/status/1800592557392707910　

周二(11日)深夜世界盃外圍賽亞洲區第2圈A組，卡塔爾以2比1擊敗印度，兼踢對手出局。不過，睇番慢鏡，卡塔爾球員射入扳平1球之前，個波已經出晒底線，應該判入球無效，但南韓籍球證金雨盛視若無睹，造成大冤案。

印度今場只要贏波，就可以取得小組次名，晉級下一圈外圍賽，佢哋上半場37分鐘入波領先。戰至73分鐘出現全場最具爭議性一幕，當時卡塔爾中堅艾曼頭槌攻門，印度門將辛度接波甩手，皮球漏出底線，應該判角球。

不過，卡塔爾球員艾哈辛照出腳，將皮球踢入場內，由艾曼射入空門扳平1比1。印度球員提出強烈抗議，但球證及旁證仍然維持入球有效判決，印度士氣嚴重受打擊之下，85分鐘再失1球，作客輸1比2而回。

賽後大量網民為印度抱不平，紛紛話：「太黑暗，史上最唔公平比賽」、「球證送卡塔爾1粒鬼球」。卡塔爾賽前已穩奪晉級資格，今場「搏命」爭勝，爭議性聲中贏波，反而令聲譽受損。