英國靈媒預言　科頓率英格蘭入決賽

英格蘭嘅歐國盃之旅即將展開，菲爾科頓喺出發去德國前，曾拜訪一位星級靈媒預測運程。英國《太陽報》就搵該靈媒專訪，根據佢嘅預言，英格蘭唔單止會喺首仗贏塞爾維亞，仲會殺入歐國盃決賽添！

呢位星級靈媒叫Chloe Smith，據報菲爾科頓同女友Rebecca Cooke喺飛德國前曾經拜訪，Chloe用塔羅牌為佢哋占卜外，更曾經同菲爾科頓祖父「通靈」。Chloe接受《太陽報》訪問，透露佢睇到嘅英格蘭前程：「英格蘭會贏塞爾維亞，雖然過程好緊湊，但最後都冇問題。」

Chloe進一步表示：「英格蘭將充滿愛同歡樂，我哋有一支好球隊、一支充滿靈性嘅球隊，菲爾科頓喺佢祖父嘅支持同指引下，會係球隊嘅幸運星，我見到英格蘭一直殺入決賽。」Chloe喺英格蘭好有名氣，唔少影視明星都係佢嘅客仔。