史上最黑！盧卡古膝頭越位　今屆第3球詐胡

比利時喺歐國盃E組反彈，2比0贏羅馬尼亞保住出線希望，呢場波盧卡古作用甚大，不過佢就繼續「黑仔王」本色，下半場入波因膝頭同腳尖越位，連續2場合共第3個入波被VAR推翻

盧卡古上場對斯洛伐克，已經因越位同隊友手球而有2個入波被作廢，今場64分鐘接應奇雲迪布尼直線射入，又因膝頭同腳尖些微凸出而被推翻，好運嘅話佢已經有3個入波排射手榜第1位。

盧卡古今屆未入波實在離奇，佢有8次射門係今屆各隊第2位，5次命中目標更加係各隊之冠，不過佢除咗黑仔之外，4次錯失黃金機會亦係「失機王」。

雖然冇乜入波運，不過隊友都大讚佢嘅貢獻，奇雲迪布尼賽後表示：「盧卡古只係冇運，佢今場踢得好好，佢助攻畀泰利文斯就證明佢踢法無私，我認為佢今屆演出非常之好。」