克羅地亞正式被判死刑　莫迪歷仲想踢世界盃

隨住斯洛文尼亞打和英格蘭，以3分成為其中1支小組最佳第3名出線之後，令B組只有2分嘅克羅地亞正式確定出局，但據悉38歲老將莫迪歷仍未打算退出國家隊，甚至有意協助球隊出戰2026年世界盃。

4個小組最佳第3名出線席位，荷蘭、斯洛文尼亞佔其中2席，加上A組第3位匈牙利有3分在手，以及E組4支球隊都有3分，令等待奇迹出現嘅克羅地亞最終希望幻滅。早前有傳克羅地亞3位老將莫迪歷、杜馬高維達、比列錫將於球隊出局後退出國家隊，但根據英國傳媒爆料莫迪歷未言退，呢位皇馬老將希望協助球隊奪取2026年世界盃決賽周入場券，並想再次參加呢項大賽，如果成事，意味屆時佢將以40歲高齡參賽。

莫迪歷至今為克羅地亞上陣178次，屬於球隊史上披甲次數最多球員，並累積入26球及29次助攻，佢為克羅地亞參加5屆歐國盃，最好成績係2008年打入8強，另外有2次入16強，2次分組賽出局。