瘋狂跣自己友　馬倫破歐國盃最快烏龍波紀錄

今屆歐國盃頻頻出現烏龍波，周三(26日)凌晨荷蘭2比3不敵奧地利，荷蘭前鋒唐耶爾馬倫開賽6分鐘就擺烏龍，成為賽事史上最快烏龍波，令今屆烏龍波數字增添至7球，好可能會打破上屆歐國盃11球烏龍波嘅紀錄。

唐耶爾馬倫頭2場分組賽都做後備，難得今場擔正卻出事，回防剷波擺烏龍，認真黑仔，呢位多蒙特射手原本有機會將功補過，但單刀射失，變成罪加一等，結果踢到72分鐘被換走。反而入替佢嘅韋格賀斯上陣3分鐘，就貢獻助攻，一度由迪比扳平2比2，可惜最終都係輸波。

韋格賀斯首場分組賽對波蘭，後備上陣射入致勝1球，加上今場有助攻，難怪愈來愈多呼聲，要求領隊朗奴高文畀佢做正選。

今屆歐國盃射手榜有5位球員以2球，並列榜首，包括今場為荷蘭入波嘅加普，但相比7球烏龍波，呢5位前鋒簡直小巫見大巫。歐國盃史上單屆最多烏龍波係上屆11球，今屆分組賽未踢完已經出現7球，超越上屆紀錄機會非常大。