專揀大賽生BB　京士利高文暫離法國侍產

法國喺歐國盃16強大戰比利時前，翼鋒京士利高文獲准暫時離隊，飛去瑞典陪老婆Sabrina Duvad迎接佢哋第2個BB出世。咁啱得咁蹺，京士利高文上屆歐國盃期間，亦要拎「侍產假」去見證佢哋首個愛情結晶出生。

法國媒體《RMC Sport》報道，京士利高文已經飛去瑞典侍產，預計只係逗留一段短時間，唔會影響佢周二(2日)凌晨對比利時候命。不過京士利高文今屆3場分組賽，只係後備上陣1次踢過15分鐘，並唔係法國嘅主力人選。

28歲嘅京士利高文同前妻育有2個仔女，2019年同現任妻子Sabrina Duvad一齊，喺上屆歐國盃期間兩人誕下第1個BB，當時京士利高文亦要申請離隊侍產，今屆歐國盃又「歷史重演」，京士利高文同Sabrina Duvad兩個BB果然有「大賽命」。