意足總宣布史巴列堤留任　球迷：世界盃席位凍過水

意大利喺今屆歐國盃16強被瑞士壓倒性擊敗，衞冕失敗，整體表現令人慘不忍睹，領隊史巴列堤戰術部署備受批評，一度傳出可能被炒。不過，意大利足總會長格拉雲拿宣布，呢位「光頭名帥」會留任至2026年世界盃之後，消息令人嘩然，唔少網民及球迷認為，意大利繼續由史巴列堤執教，恐怕入唔到下屆世界盃決賽周。

格拉雲拿話：「我哋已經同史巴列堤詳細傾過，佢只係接任領隊9個月，冇理由就咁打斷一項制定多年嘅計劃，佢會繼續領軍出戰2026年世界盃。」史巴列堤表示，會對球隊進行年輕化，意大利足總於明年舉行會長選舉，格拉雲拿能否留任仍然係未知之數，如果佢落選，新會長未必保住史巴列堤。

意大利將於9月歐國聯對法國，以球隊低迷狀態，恐怕隨時又輸1場，屆時史巴列堤面臨嘅壓力肯定更大。唔少網民及球迷嘲諷史帥，未必可以為意大利取得下屆世界盃席位，佢到最後可能都係無法履行完合約。