東網電視
更多新聞短片
杜費斯被指侵犯哈利卡尼。(Getty Images)
英格蘭喺歐國盃4強2比1反勝荷蘭，追和嘅12碼引起爭議，當時哈利卡尼窩利射門，杜費斯起腳攔截接觸輕微，但VAR介入後仍判12碼，荷蘭將帥賽後齊齊炮轟德國球證薛威拿，隊長華基爾雲迪積克更指球證完場後「知衰」即時走佬。
曾經因打假波被停賽半年嘅球證薛威拿，賽前被傳媒質疑會針對英格蘭，但結果覺得唔公平嘅係荷蘭，領隊朗奴高文賽後表示：「後防可以點做？呢球絕對唔係12碼，杜費斯想阻擋射門，兩個人隻鞋撞埋一齊，呢啲VAR判決喺度摧毀緊足球。」
至於喺比賽期間，因向球證投訴過激而食黃牌嘅華基爾雲迪積克，賽後踢爆薛威拿完場後即「走佬」：「球證喺吹完場之後第1時間返入更衣室，呢個動作說明一切，我連同佢握手都趕唔切。一切都已成定局，我哋最後都要輸波。」
