一個原因　舒克斯要求着曼聯9號

荷蘭前鋒約舒亞舒克斯已經抵達曼徹斯特接受體測，即將正式加盟曼聯，根據《天空體育》爆料，呢位23歲射手要求着紅魔鬼9號球衣，因為佢嘅偶像就係當年「曼9」伊巴謙莫域。

曼聯同意用3,400萬鎊(約3.4億港元)向博洛尼亞買斷約舒亞舒克斯，雙方將簽約5年，由於上季曼聯9號仔安東尼馬迪爾已經離隊，舒克斯希望接手成為新「曼9」，就好似偶像伊巴謙莫域2016年夏天成「魔」着9號一樣，舒克斯效力博洛尼亞期間都係着9號。

身高1米93嘅約舒亞舒克斯上季踢34場意甲射入11及4次助攻，佢高大之餘，個人技術亦非常細膩，踢法的確同伊巴謙莫域相似，但呢位瑞典神鋒效力曼聯第2季，轉為着10號，曼聯現時10號屬於拉舒福特，所以傳統上代表射手嘅9號球衣無疑係約舒亞舒克斯最佳選擇。

由於約舒亞舒克斯有份協助荷蘭打入歐國盃4強，預料會放假2星期，將錯過曼聯首4場季前熱身賽，可能等到8月4日美國之旅對利物浦，先至會上演成「魔」處子戰。