皇馬勢力成大贏家　3人捧歐聯+歐國盃

西班牙奪得歐國盃冠軍，皇馬勢力成為大贏家，丹尼爾卡華積、拿祖費南迪斯、祖斯盧辛馬田今年捧晒歐聯及歐國盃，齊做「雙歐之王」，一次過將史上同年贏盡呢兩項錦標嘅人數增至13人。

西班牙對英格蘭，無論邊隊勝出，都有皇馬球員成為「雙歐之王」，結果丹尼爾卡華積擊敗「銀河艦隊」隊友祖迪比寧咸，獲此殊榮。加上拿祖費南迪斯、祖斯盧辛馬田亦係皇馬捧歐聯冠軍成員，依家攞埋歐國盃冠軍獎牌，但2人已經落實今夏離開皇馬。

在此之前，曾經有10位球員同年捧歐聯及歐國盃冠軍，分別為1964年效力國際米蘭嘅西班牙中場路易斯蘇亞雷斯，1988年4位荷蘭兼燕豪芬球員朗奴高文、雲艾利、雲尼保、尹布基倫，2012年西班牙嘅車路士孖寶費蘭度托利斯、桑馬達，2016年皇馬嘅2位葡萄牙國腳C朗、比比，上屆則有當時效力車路士嘅意大利中場佐真奴費路。